原刊於2010年2月9日蘋果日報專欄專論  隔牆有耳  By 李八方

今年維園年宵，由於華叔抱恙，好多市民都想去問候華叔，送上祝福，並且搜購華叔揮春同新書，所以支聯會攤位肯定比往年旺場。公、社兩黨就講明藉年宵籌錢撐公投，所以推出唔少正，支持者不容錯過。仲有，民建聯個場都唔可以忽視，因為有網民已經動員去踩場。

咁多政黨中，公民黨噚日食頭啖湯最早開檔，除主打黨魁余若薇寫靚揮春外，辭職投身公投運動傑哥同Tanya亦推出有兩人嘜頭轉運風車。噚日有市民行過，上前祝Tanya「添丁發財」同「補選成功」，Tanya回應話暫時冇準備添丁，但就希望「普選成功」。

跟林逸之學書法余若薇就話，會把握檔口同市民直接接觸機會，推動五區公投，除推出十蚊一套五區公投書籤，佢亦會親自寫揮春，每張盛惠18元，佢噚日仲即席寫幅「庚寅迎公投，福虎爭普選」，應景又應節。

雙截蕉大受歡迎

同公民黨拍住上社民連開市時就冇咁順利，撞正大雨，但前主席毓民乜風雨未見過，依然落力叫賣。毓民坦言，五區公投籌款成功與否，好睇年宵銷情如何，所以希望緊幾日唔好再落雨。今次社民連主打商品，要數唔少網民已訂社民連figure公仔，Q版賣280元，黑色特別版賣500元。八方現場發現，最受歡迎仲係載譽重臨雙截蕉，據知上年蕉好快斷市，幫社民連籌到成廿幾萬；毓民話今次雙截蕉取名為「五區公投雙截蕉」，一款寫住「五區公投，全民公決」，另一款寫住「香港民主，臨門一腳」，最慘大陸工廠今年唔敢接單整蕉，搞到社民連要搵東南亞廠生產，盛惠30蚊一對。

有高登網民就設計兩款Tee，放社民連個攤位寄賣，一款印住民記個DAB嘜頭上「禮義廉」三個字，另一款就仿QR碼寫住「民建聯最無恥」。網民聲稱一個鐘就賣20件。與此同時，一班網民亦facebook發起，聽日3點去維園搵民建聯人寫「禮義廉」揮春，有網民仲上載張相上facebook，話已經民記攤位寫張「禮義廉」。

pf_lee@appledaily.com