原刊於2010年3月10日明報  Emily

社民連「長毛」梁國雄辭去立法會議員一職後，又恢復返佢以前議事廳外「惡搞」官員生活，噚日撞勞工及福利局長張建宗出席一項公開活動，長毛就活動舉行酒店樓下請願。為逼張局長接信，長毛仲不惜發毒誓，以性命擔保張局長接佢封信，包保無人身安全問題，否則就天打雷劈。

「保證安全否則天打雷劈」

噚日長毛、社民連主席陶君行等一行十多人齊齊去到現場，要求最低工資立法時薪唔少於33 元，仲反對埋功能組別，不過遲遲唔見張局長到場，一行人就開始鼓譟， 高叫「張建宗， 玩失蹤」，長毛又聲言「我有食煙，有交稅，張建宗應出接信」；仲聲言話張局長唔接信就會有「報應」，不排除下次公眾場合掟佢蕉！

警察行埋去交涉，雖然Emily 聽唔到佢講乜，但長毛大大聲回答： 「我保證佢安全！」佢仲話， 「我保證無人打佢或者掂佢，否則天打雷劈，出街畀車撞死！」後張建宗到場後，就上前同長毛握手，接佢封信，局長識做，長毛自然無惡搞佢喇。